Simpleng Aral

May notion ako nitong mga nakaraang araw na posibleng ang mga komplikadong bagay na nangyayari sa akin ay mali. Kapag hindi ko maunawaan, hindi din kayang ipaliwanag nang iba sa akin, una kong naiisip na may mali sa mga nangyayari. Baka may kulang sa impormasyon, o may hindi pagkakaunawaan.

Kung gaano kasimple ang bagay, ganun din iyon kadaling gawin. Kung madaling gawin ang isang bagay, madali syang araw-arawin. Kapag madaling araw-arawin hindi malayong makamit ang nais nang hindi kailangang masaktan.

Araw-arawin mo ang pag-iisip ng paraan kung paano ka huhusay sa mga bagay na pinagkakaabalahan mo. Hindi mahalaga kung sa tingin mo ay sobrang bagal ng progress. Ang kakayahan ay parang nagkapatong-patong na interes, palaki nang palaki kahit wala kang ginagawa. Mahirap i-unlearn ang mga bagay lalo na kung sobrang dali na nito para sa iyo.

***

Ang sikreto para sumaya ka ay ang paggawa ng mga simpleng bagay. Dahil kung babalikan ang kasaysayan, siguridad (security) lang ang binibigay ng kayaman at kapangyarihan. Pinag-aralan iyan ng mga positive psychologists. Ang simpleng pagdidilig ng halaman, pakikipagkwentuhan, kasama ang iba pang hindi mabilang at malilit na bagay ang nagpapasaya sa isang tao. 

Ang ideya ng pagbabahagi at pakikibahagi sa iba ng mga natanggap na pagkilala at parangal ang nagpapasaya sa isang tao hindi ang mismong pagkakaroon nito. Kung hindi man ganun, sa huli ang hinahanap ng tao ay ang pagsang-ayon at paghanga mula sa  kapwa. Minsan nagiging tanga ang tao sa paghahanap ng pagsang-ayon ng iisang tao lang kapalit ng mas malalaking bagay na mayroon na siya. Kawalan ng dangal para sa huwad na karangalan. Kawalan ng kaibigan para sa bagong kaibigan.

***

Subalit ang mga madadaling bagay ay madadali lang ding hindi gawin.

Madaling ipagpaliban ang mga ito sa purong kadaahilanang madali lang silang gawin. Iniisip mo na kahit anong oras ay pwede naman silang matapos at wala namang biglaang parusa ang hindi paggawa ng simpleng bagay. Madaling hindi magbasa kahit limang pahina ng isang magandang libro (hindi nobela ha) gabi-gabi. Madaling hindi pumasok araw-araw lalo na kung pakiramdam mo walang mawawala sa iyo. Madaling tumingin sa kamalian ng iba, mas madaling mamintas. Kapag hindi mo ginawa ang simpleng bagay, pakiramdam mo ay walang nangyari. Pwede ring, kapag ginawa mo ang maliliit na bagay, aakalain mong walang epekto ito sa pagtupad ng napalaki mong hangarin.

Siguro ang simpleng aral ngayong araw ay pagbabago ng kaisipan,pagtanaw nang mas malayo sa karaniwan. Pagpapahalaga sa mga simpleng bagay. May misteryo kasi lagi ang mga komplikado kaya laging sila ang kumukuha ng atensyon ng karamihan. Pero kahit bali-baliktarin mo pa ang kasaysayan, ang mga artikulante, engrandeng komplikadong bagay ay mababakas sa pinagpatong-patong, pinagsama-samang simple’t maliliit na bagay. Pero syempre, hinabi sila sa pinakamagandang paraan.