Paano Maging Superhero?

Magulo pa din ang nangyayari sa paligid ko. Dala ito, marahil, ng magulong pag-iisip. Siguro hindi lang naman ako ‘to, lahat naman pansin ang hindi perpektong mundo. Normal lang na makaranas ng pagkawindang minsan. Hindi ginagawa ang thesis na dapat tapos na; libro na nakatengga pa din; mga pelikula na pinangakong papanuorin. Normal iyan. (At may kanya-kanya tayong paraan para pagaanin ang kanya-kanyang loob.)

Madalas, hindi ako umaabot sa pagbibigay ng solusyon sa mga problema. Sabi sa kwento, dapat daw patayin  ko ang gagamba imbes na araw-araw kong alisin ang mga sapot. Kung ganun, dapat kong tignan ang fundamental na problema bago kamadahin ang mga dapat tapusin na iyan. Kailangan kong balikan ang punot-dulo nito. At isa lang ang nakita ko: Maling kwento ang sinasabi ko sa sarili ko.

 Halimbawa ang undergraduate thesis ko. Simple lang ang mga kwentong kumakalat tungkol sa mga undergraduate thesis sa Department of Social Sciences: “Mahirap ang thesis. Nakakadelay ito lalo. Mag-practicum ka na lang.”

Kaya ang kwentong binabanggit ko sa sarili ko (unconsciously): Mahirap ang thesis, kaya kailangang mag-rant ako sa facebook at sisihin ang adviser ko dahil wala syang maitulong sa akin. Hindi ako matatapos sa isang sem at madedelay na naman ako. Nakakahiya.

Totoong may batayan ang sinasabi ng iba, pero hindi sapat na dahilan iyon para maging pangkalahatang diskurso ng ginagawa ko. Marahil, may isang solusyon dito: Mag-isip ng pinaka-astig na kwento.

Imbes na puro rant baka pwedeng ang kwento ko ay:

Mahirap ang thesis ni C. Bago ang konsepto nya kaya dini-discourage  na naman sya ng mga tropa nyang professor.Hindi na bago iyon. Dati, gumawa na din sya ng   proposal at tinanggihan nila dahil MAHIRAP daw isagawa ang mga naiisip nya. Pero magpapatuloy si C.  Magbabasa sya nang magbabasa, mag-iisip nang mag-iisip at magsusulat nang magsusulat. Hindi nya papansinin ang sasabihin ng iba at hindi matatakot kung ano man ang kakalabasan ng gagawin niya.

Ngunit mapapansin niyang hindi madali ang pinaplano nya. Malakas makahatak ang mga negative status ng mga kaklase niya. At mahirap tanggihan ang anime na matagal nya ring gustong panuorin. Pero dahil awesome si C, hindi siya basta-bastang magpapadala sa distractions --- hanggang mapunta siya sa ZONE. Sa Zone, mas tatalas ng kaunti ang isip niya at sasapi ang mga spirito ng mga awesome na sociologists (wag sanang si Karl Marx). Mas bibilis syang magsulat at mag-analyze ng data. Kagaya sa comics, hindi naman pala total loner itong hero natin. May mga awesome na kaibigan sya --- mga statistician. Reresbak ang mga kaibigan niya para sa kanya. Hindi nya mapapansin, natapos na niya ang thesis nya sa loob ng tatlong buwan.

Sige, real talk. Baduy ang kwento na ito, hindi ito astig. Purong optimism kasi. Pero pansinin, ganyan din ang pattern ng mga kwento ng mga superheroes natin. Mapa-comics o manga man, may conflict-resolve din. Isa lang ang ibig-sabihin nito: boring ang routine ng mga superhero.

Kung awesome sila, dapat awesome din ang routine nila, hindi ba? Hindi. Mali ang itinuro sa’yo ng tv at ng mga pelikula. Sisihin mo sila. Pinapalabas nilang easy-to-do lang ang training ni Saitama, pero sa totoo, kahit si Pacquiao magmumukhang anemic pag ginawa nya yun. Sa mundo ng mala-pantasyang istorya, ilang minuto/oras mo lang mapapanuod ang “training”. Pabalat-bunga pa ito at condensed, dahil limitado lang naman talaga ang oras ng isang pelikula. Pero, kapag isinalin mo sa totoong buhay, 10, 000 hours talaga ang kailangan mo para maging bihasa’ o “master” sa craft mo. Kung hindi mo pa alam iyan, inililihim nila iyon para konti lang ang maging superhero. Manuod ka nang manuod ng mga superhero --- hindi ka magiging superhero. Pwede kang maging otaku o comic-fan. Hindi superhero.

Isa lang din ang ibig-sabihin nyan, kung gusto mong mabuhay na parang superhero, isa sa mga dapat mong  gawin ay gamitin gasgas na frame ng kwento nila.

Pero boring yun eh.

Ganito na lang, magkaroon tayo ng kasunduan. 1)Gumawa ka ng script (pinaka-astig na kwento mo) 2) Sundin mo nang buong husay. 3) Kapag na-achieve mo na, saka tayo mag-usap kung baduy ba talaga ang maging superhero.