Cancer

Kasama ang isang kaibigan, sinabi mo,

Tatlong buwan na lang at paalam na,

Hindi kaagad naniwala, kasi buhay ang nakasalang,

buhay na iisa at tangi, yaong hindi binibiro ang katapusan.

Hindi mo yan nakasanayan, magkwento,

Lalo na ng malungkot, mapait na pagtatapos.

Una sa pandinig, nagudyok ng pagkagulat.

Napasandal sa tiwala, walang halo ng pagdududa.

Basang mga matang hindi pinatutuluan ng luha,

Itinitira para sa kasarian, huwad na nararamdaman.

At siyang totoo, hindi takot magpakita ng emosyon,

Nakapagbunyag ng kasinungalingan, nakapagsara ng telon.

Sabi ko: Magaling na artista, epektibong drama.

Nalaro ang emosyon, walang malay na biktima,

Magaling na produksyon, lahat ay unang kuha.

Sa pagbitaw ng huling linya, sana’y di na maulit pa.