Bakit Kelangan ng Kape sa Umaga?

Isang umaga nagising ka, ang kape ay nakalagay sa lamesa. Katabi nito ang creamer at ang nakabukas na lalagyan ng asukal. Nilalanggam. Binuhat mo ang thermos, medyo mabigat. Kinuha mo ang kutsarita kasama ang isang tasa. Oo Nagtimpla ka.

Pinagmamasdan mo ang usok na tumataas mula sa maiinit na tasa ng kape.  Ilalapit mo ang pang-amoy. Hmm!! Sarap ng aroma!! Sa pagkasabik ay magmamadali ka sa paghigop kaya mapapaso ka. Tama! parang pag-ibig! Pag-ibig na maaaring iugnay sa lahat. Pag-ibig na parang ikaw, ako, parang isang alagad ng sining, isang litrato, droga: marijuana, shabu at heroine. Just like a coffee in your mouth: where bitter and sweet perfectly sojourn. (Ayie! Ingles yan!) Hihigop ka sa pangalawang pagkakataon. Pero bago pa man makarating ang kape sa lalamunan ay idudura mo ito agad dahil ayaw mong lunukin ang kapeng may kahalong langgam. Hahaluin mo ang kape para masalok palayo ang mga guyam.

Nakadekwatro. Malaya. Ininom mo ang kape, Syete!! ang tabang!!. Lalagyan mo pa sana ng asukal pero dahil naisip mong mahirap maghirang ng mga langgam, tiniis mo na lang.(Woops! Tama na sa pagpapaliwanag kung paano naging kaugnay ng pag-ibig yan!.) Mag-eextend ka sa pananaginip.

***

Nanaginip ako kagabi, ako daw si Li Min Ho (gwapo naman!!). Pero sa halip na ikatuwa ko,( dahil gwapo at sikat nga ako), pinagsisihan ko ito. Bakit? City Hunter kasi ang tema. Hinahabol ako ng mga yakuza. (Diba sa Japan yun?) Basta, yakuza yung mga yun alam ko. Pa-cool kasi, wala akong kasamang tropa. Mag-isa ko lang lalabanan ang mga balbasarado, at pormadong goons na naka-tux at shades. Kinalabit ko ang gatilyo ng handgun ko. Potek! Props lang! Pellet gun! Wala pang bala.

Tumakbo ulit ako, nakarating ako sa France. Nagpa-picture sa Eiffel Tower kasama ang magaganda at seksing dalaga. Bibigyan ko sana silang lahat ng autograph, baby, tinedyer, senior citizens, lahat sila, pero napatanong ako. Sikat nga ba si Li Min Ho sa France? Doon ko na naalalang hinahabol ako ng mga yakuza. Sa hindi maipaliwanag na dahilan, bigla ngang lumitaw ang mga goons sa kung saan. Sampung metro pa ang layo nila kaya nakatakbo at nakalayo pa ako. Umabot ang habulan sa US, kasapakat na nila ang CIA. Napagod na ako sa katatakbo, kaya nakatulog ako. Salamat hindi ako nanaginip sa panaginip ko. Masyado kasing hahaba ang kwento.

Paggising ko(bilang si Li Min Ho) wala na akong maalala. Nasa ospital daw ako. At kagaya sa ibang  telenobelang napanood ko, may cute na babae ang lumpait nagpakilala na fiancé ko daw. This time si Angel Locsin iyon. Hindi ako naniwala.Napakagwapo talaga e! Sinigawan ko siya SINUNGALING! UMALIS KA!. Hindi pa ako nakontento, binato ko si Angel Locsin ng mansanas. Nakakahiya man, hindi siya tinamaan. Nagmamakaawa siya, nakaluhod, inlab daw talaga sya saken, tipong hindi kayang mabuhay kung  wala ako. Napaiyak ko si Angel Locsin (hindi ko alam kung dapat kong ipagyabang iyon). Pusong bato ako,bilang ako nga ang napakagwapo at napakayabang na si Li Min Ho. Hindi ko siya pinansin at sinigawan pa nang isang beses at lalo pang lumakas ang pag-iyak nya.

Napasigaw ako sa sobrang paghihinayang. WHAAAAA!!!

Kung hindi ako si Li Min Ho, naku nagkatuluyan na kami ni Angel. Kung kaya ko lang bang kontrolin ang panaginip, naku baka natupad na ang mga panaginip ko sa mga panaginip ko; dapat gabi-gabi akong nakakapagsulat ng libro; nakakapagkwento; gabi-gabing kausap yung crush ko; gabi-gabing masaya kahit sa panaginip lang. Kahit sa panaginip lang.

***
Isang umaga, nagising ka, lalagok pa sana ng kape, pero wala nang pumatak. Ang kape ay naubos. Tama! Parang pag-ibig! Nauubos!

Nauubos nga ba? Ewan. Trip mo lang bastang magrelate ng kahit ano sa pag-ibig.

Nalungkot ka. Pero sa halip na magmaktol ay nagtimpla ka ng panibagong kape. Panibagong timpla, hindi na matabang? maaari. Pwedeng tamang-tama lang o pwedeng mapapait naman. Nasasayo kung anong kalalabasan ng lasa.

Parang pag-ibig?

Sakto! Nakuha mo! Parang pag-ibig.

***

May tamang timpla ang kape, ang pag-ibig kaya?

Mahabang usapan yan parekoy. 

Bakit nga ba kailangan ng kape sa umaga? 

magkape ka kaya para ma-experience mo.

Parang pag-ibig?

SHHHH!!!